268 ಮನೆಯೇ ನಂದನ
****************
ಸಹಜತೆಯ ಪ್ರೀತಿಯಲಿ
ಅರಳಿರುವ ಮೊಗವಿರಲಿ
ಪ್ರೀತ್ಯಾಧರಗಳು ಚಿಮ್ಮುತ್ತಿರಲಿ
ಅನುದಿನವೂ ನಗುತಿರಲು
ಜೀವನವು ರಸಹೊನಲು
ಆ ಮನೆಯೇ ನಂದನ..!!
ಗುಡಿಗಿಟ್ಟ ಕಲಶದೊಲು
ಬೆಳಕೀವ ದೀಪದೊಲು
ಚೈತನ್ಯ ದ ಹಸಿರಿನೊಲು
ಪರಿಮಳದ ಕುಸುಮದೊಲು
ಹೆಣ್ಣೊಂದು ನಗುತಿರಲು
ಆ ಮನೆಯೇ ನಂದನ..!!
ನೋವಿರಲಿ ನಲಿವಿರಲಿ
ಬಾಂಧವ್ಯ ಕುಸಿಯದಿರಲಿ
ಸಿಹಿಜೇನ ಮಾತಿನಲಿ
ವಾತ್ಸಲ್ಯ ತುಂಬಿರಲಿ
ಮನ - ಹೃದಯ ಬೆರೆತಿರಲು
ಆ ಮನೆಯೇ ನಂದನ..!!
ದೇವನಲಿ ಮನ ಬೆರೆಸಿ
ಹಿರಿಯರಲಿ ಶಿರ ಮಣಿಸಿ
ಕಿರಿಯರನು ಅಪ್ಪಿ ಹರಸಿ
ನಡೆಯಿರಲಿ ಸ್ನೇಹ ನೆನೆಸಿ
ನಗುತಿರಲು ಅನುದಿನ
ಆ ಮನೆಯೇ ನಂದನ..!!
ಸ್ತ್ರೀ ಗಿರಲು ಗೌರವಾದರ
ಆ ಮನೆಗಿಹುದು ದೈವದಾದರ
ಎಲ್ಲಿ ನಗುವಳೋ ಹೆಣ್ಣು
ಆ ಮನೆಯಲಿಹುದು ಹೊನ್ನು
ಹೆಣ್ಣಾದರೆ ಮನೆಯ ಕಣ್ಣು
ಆ ಮನೆಯೇ ನಂದನ
ಚಂದದ ವೃಂದಾವನ...
ಶೈಲೂ.....
Comments
Post a Comment