63.ಕನ್ನಡಿ - ಎದುರು - ನಾ ನಿಂತಾಗ#

ಕನ್ನಡಿ - ಎದುರು - ನಾ ನಿಂತಾಗ#

ಕನ್ನಡಿಯ ಎದುರು ನಾ ನಿಂತಾಗಲೆಲ್ಲಾ

ಉಕ್ಕಿಬರುವುದು ಅಭಿಮಾನ ಕನ್ನಡಿಯ ಮೇಲೆ

ಬಹು ಪರಾಕ್ ನುಡಿವ ಭಟ್ಟಂಗಿಯಲ್ಲ..!!

ಸೀದಾ ಸಾದಾ ತೋರುವುದು ನಿಜದ ನೆಲೆ

ಬಹುಶಃ ಜಗದಲ್ಲಿ ಇದೊಂದೇ ಇರಬೇಕು

ಕಂಡದ್ದನ್ನು ಕಂಡಂತೆಯೇ ತೋರುವ ಭೂಪ

ಮಿಥ್ಯಕಂತೂ ತಾವಿಲ್ಲ ಅದಕ್ಕೇ ಇರಬೇಕು

ಶುಭಕಾರ್ಯಗಳಲಿ ಕಳಶ ಕನ್ನಡಿಯ ಪ್ರತಾಪ

ಸತ್ಯ ಹರಿಶ್ಚಂದ್ರನ ವಂಶದ ತುಂಡೇನೋ

ಸತ್ಯವನ್ನಲ್ಲದೆ ಬೇರೇನೂ ತೋರದು

ಅವರವರ ರೂಪವನ್ನವರಂತೆಯೇ ತೋರಲೆನೋ

ಮನ್ನಣೆಯು ಬಹುಪಾಲು ಈ ಕನ್ನಡಿಯದು

ಅದೆಷ್ಟು ಗರಿಮೆ ಹಿರಿತನವಿದ್ದರೂ ಸರಿ

ಬೇಧವಿಲ್ಲದೆ ನಿಜವ ಮಾರ್ದನಿಸುವುದು ಕನ್ನಡಿ

ಹಮ್ಮು ಬಿಮ್ಮುಗಳಲಿ ಉಬ್ಬಿ ಹೋದರೂ ಸರಿ

ನಿಜರೂಪವನೆ ತೋರಿ ಬರೆಯುವುದು ಮುನ್ನುಡಿ

         ಶೈಲೂ.......