245....ಕಥೆ.. ಸ್ವಪ್ನ

ನೀಳ್ಗತೆ

*******

ಸ್ವಪ್ನ

****

       ಮೊನ್ನೆ ಊರ ಜಾತ್ರೆಗೆ ಹೋಗಿದ್ದಾಗ ಅವಳನ್ನು ಕಂಡೆ... ಅವಳ ನಿಸ್ತೇಜ ಮುಖ ಗುಳಿಬಿದ್ದ ಕಣ್ಣುಗಳು, ಬಳುಕುವ ಬಳ್ಳಿಯಂತಿದ್ದ ಅವಳು ಗಾಳಿ ಬೀಸಿದರೆ ಹಾರಿ ಹೋಗುತ್ತಾಳೆನೋ ಅನ್ನುವಷ್ಟು ಸವೆದಿದ್ದ ಅವಳನ್ನು ನೋಡಿದ ತಕ್ಷಣವೇ ಕರುಳು ಕಿವುಚಿ ಬಂತು... ಅರಿವಿಲ್ಲದೆಯೇ ಕಣ್ಣೀರ ಕೊಡಿ ಹರಿಯಿತು.  ಎಷ್ಟು ಲವಲವಿಕೆಯಿಂದಿದ್ದ ಅಕ್ಕನ ಮಗಳು ಸ್ವಪ್ನ ಇಂದು ಜೀವಚ್ಛವದಂತೆ ಕಂಡಾಗ ದುಃಖ ಉಮ್ಮಳಿಸಿ ಬರದೇ ಇರಲಿಲ್ಲ. ಹಾಗೆಯೇ ಮನಸು ನೆನಪಿನಾಳಕ್ಕೆ ಜಾರಿತು.

        ಸ್ವಪ್ನ ಹುಟ್ಟಿದಂದಿನಿಂದಲೂ ಮನೆಯಲ್ಲಿ ಎಲ್ಲರೂ ಇವಳೇ ನಿನ್ನ.ಹೆಂಡತಿ ಎನ್ನುತ್ತಿದ್ದಾಗ, ಆ ಮುದ್ದುಗೊಂಬೆಯನ್ನು ನೋಡಿ ಸಂತಸ ಉಕ್ಕುತ್ತಿತ್ತು, ಅಕ್ಕನಿಗೂ ನನಗೂ 13 ವರ್ಷಗಳ ಅಂತರ, 20 ಕ್ಕೆ ಅಕ್ಕನ ಮದುವೇಯಾಗಿ 21ಕ್ಕೆ ಸ್ವಪ್ನ ಹುಟ್ಟಿದಾಗ ತೊಟ್ಟಿಲಿಗೇ ತಾಳಿ ಕಟ್ಟುವಂತೆ.. ನನ್ನ ಸ್ವಪ್ನಳ ಮದುವೆಯ ಮಾತುಕಥೆಯಾಗಿದ್ದಿತು.  ಮದುವೆಯ ಅರ್ಥ ಗೊತ್ತಿಲ್ಲದ ವಯಸ್ಸಾದರೂ ಮುದ ನೀಡುತ್ತಿದ್ದ ಆ ಹೆಸರು ಸ್ವಪ್ನ ಬೆಳೆದಂತೆಲ್ಲಾ  ಕಚಗುಳಿಯಿಟ್ಟಂತೆ.ಬಾಸವಾಗುತ್ತಿತ್ತು... ದಿನೇ ದಿನೇ ಚಂದ್ರಮನಂತೆ ಹೊಳೆಯುತ್ತಿದ್ದ ನನ್ನ ಸ್ವಪ್ನ ಅಪ್ಸರೆಯನ್ನೂ ಮೀರಿಸುತ್ತಿದ್ದಳು

         ಇಬ್ಬರೂ ಹದಿಹರೆಯಕ್ಕೆ ಕಾಲಿಟ್ಟಾಗ, ಒಬ್ಬರನೊಬ್ಬರು ನೋಡಿದಾಗ ಏನೋ ಪುಳಕ, ಸದಾ ಜೊತೆಯಲ್ಲಿಯೇ ಇರಬೇಕೆಂಬ ತವಕ,  ಕಣ್ಣು ಕಣ್ಣು ಸೇರಿದಾಗ ಮೈಯಲೆನೋ ಮಿಂಚು, ಕದ್ದು ಕದ್ದು ನೋಡುವ ಸಂಚು... ಅಂತೂ ಒಬ್ಬರನ್ನೊಬ್ಬರು ಬಿಟ್ಟಿರಲಾಗದಂತ  ಮನಸ್ಥಿತಿಯಿದ್ದಾಗಲೇ... ಅಪ್ಪನಿಗೂ .. ಭಾವವನಿಗೂ ಕ್ಷುಲ್ಲಕ ಕಾರಣಕ್ಕೆ ವೈಮನಸ್ಯ ಶುರುವಾದದ್ದು,  ಭಾವ ಸಂಸಾರ ಸಮೇತ ಮನೆ ಬಿಟ್ಟು ಹೊರಟಾಗಿತ್ತು. ಅಮ್ಮ, ಅಕ್ಕ ಎಷ್ಟು ಅತ್ತುಕರೆದರೂ  ಅಪ್ಪ - ಭಾವ ಕೇಳುವ ಸ್ಥಿತಿಯಿರಲಿಲ್ಲ..

. ಇವರಿಬ್ಬರ ಜಗಳದಿಂದ ಹೊಡೆತ ಬಿದ್ದದ್ದು ನನ್ನ ಹಾಗೂ ಸ್ವಪ್ನಾಳ ಬಾಳಿಗೆ.  ಮುದ್ದು ಮೊಮ್ಮಗಳೇ ಮುದ್ದಿನ ಸೊಸೆಯೆಂದು ಮುದ್ದಿಸುತ್ತಿದ್ದ ಅಪ್ಪ,  ನಮ್ಮ ಪ್ರತಿಷ್ಠೆ ಗೆ ತಕ್ಕಂತೆ ಇನ್ನೂ ಉತ್ತಮ ವಧುವನ್ನು ತರಲು ಶಕ್ಯರಾದರು... ಅದೆಷ್ಟೋ ನಿರಾಕರಣೆ - ವಿರೋಧದ ಮಧ್ಯೆಯೂ ನನ್ನ ಮದುವೆ ನಿಷ್ಕರ್ಷೆಯಾಗಿಯೇ ಹೋಯ್ತು.  ಇದನ್ನು ತಿಳಿಡ್ಸ್ ನಂತರ ಭಾವ ತಮ್ಮ ಪ್ರತಿಷ್ಠೆ ಗೂ ಹೆಚ್ಚಿನ ವರನನ್ನು ಸ್ವಪ್ನಳಿಗಾಗಿ ಹುಡುಕಿಯೇ ಬಿಟ್ಟರು.  ಎಲ್ಲರ ಕಣ್ತಪ್ಪಿಸಿ ಸ್ವಪ್ನ ನನ್ನನ್ನು ಮೀಟಾಗಿ,  ಮಾವ ಬದುಕಿದರೂ ನಿನ್ನ ಮಡಿಲಲ್ಲೇ,  ಸತ್ತರೂ ನಿನ್ನ ಮಡಿಲಲ್ಲೇ... ಈ ಬಲವಂತದ  ಮದುವೆಯನ್ನು ತಪ್ಪಿಸಿ ನನ್ನನ್ನು ಪಾರುಮಾಡಿ, ನೀವು ನನ್ನನ್ನೇ ಮದುವೆಯಾಗಿ ಎಂದು ಅಂಗಲಾಚಿದಾಗ  ಏನೊಂದೂ ಮಾಡಲಾಗದ ನನ್ನ ಅಸಹಾಯಕ ಪರಿಸ್ಥಿತಿ ನನ್ನನ್ನು ಕೈಲಾಗದವನಂತೆ ತಲೆತಗ್ಗಿಸುವಂತೆ ಮಾಡಿತ್ತು.  ಹಿರಿಯರಿಬ್ಬರ ದ್ವೇಷಕ್ಕೆ ಅಮಾಯಕ ಬಲಿಪಶುಗಳು ನಾವಾಗಿದ್ದೆವು.

       ಅಂತೂ ಮದುವೆಯಾಯ್ತು... ಇನ್ನು ಇಲ್ಲೇ ಇದ್ದರೆ ನನ್ನ ಸಂಸಾರ ಸುಖವಾಗಿರುವುದಿಲ್ಲವೆಂದು ಅಪ್ಪ ಬೆಂಗಳೂರಿನಲ್ಲಿ ಮನೆಮಾಡಿ ನಮ್ಮಿಬ್ಬರನ್ನು ಕಳುಹಿಸಿದ್ದೂ ಆಯ್ತು,  ಅಂತೂ ನನ್ನ ಸ್ವಪ್ನ.... ನಂಗೆ ಸ್ವಪ್ನವಾಗಿಯೇ ಉಳಿದುಹೋದಳು. ಹೇಗೋ ಇಷ್ಟವಿಲ್ಲದ ಜೀವನವನ್ನು ಕಷ್ಟಪಟ್ಟು ನಡೆಸುತ್ತಾ... ಅಪ್ಪ ಅಮ್ಮನನ್ನು ಹಾಗೆಯೇ ಜಾತ್ರೆಯನ್ನು ಕಣ್ತುಂಬಿಸಿಕೊಳ್ಳೋಣವೆಂದು ಬಂದರೆ... ಸ್ವಪ್ನಳ ಈ ರೂಪ ಕರಳುಕಿವುಚಿದಂತಾಯ್ತು..  ಏನಾಯ್ತು ನನ್ನ ಸ್ವಪ್ನಳಿಗೆ? ಕಲ್ಲಿನಲ್ಲಿ ಕಡೆದ ಶಿಲ್ಪದಂತಿದ್ದ ಸ್ವಪ್ನ ಸೊರಗಿಹೋದದ್ದೇಕೆ?  ಈ ಯೋಚನೆಯಲ್ಲಿಯೇ ಮುಳುಗಿದ್ದ ನನಗೆ ಎಚ್ಚರಾಗಿದ್ದು... ಯಾರೋ ನನ್ನ ಕೈಯ್ಯಲ್ಲೊಂದು ಪೇಪರ್ ತುರುಕಿದಾಗ...  ಯಾರೆಂದು ನೋಡುವಷ್ಟರಲ್ಲಿಯೇ  ಮರೆಯಾಗಿದ್ದಳು ಸ್ವಪ್ನ... ಸ್ವಪ್ನಾ... ಸ್ವಪ್ನಾ...  ನನ್ನ ಕೂಗಿಗೆ ಅವಳು ತಿರುಗಿನೊಡಲೇ ಇಲ್ಲ... ಕೈಯಲ್ಲಿದ್ದ ಚೀಟಿ ಬಿಡಿಸಿನೋಡಿದಾಗ  ರಾಧಾಕೃಷ್ಣನ ದೇವಾಲಯಕ್ಕೆ ಬಾ ಮಾವ.ಎಂದಷ್ಟೇ ಇತ್ತು...  ಸರಸರನೆ ದೇವಾಲಯದತ್ತ ಧಾವಿಸಿದೆ....ಕೃಷ್ಣನ ಮುಂದೆ ಕಣ್ಮುಚ್ಚಿ ನನ್ನ ಸ್ಪಪ್ನ ನಿಂತಿದ್ದಳು.... ನನ್ನ ನೋಡಿದಾಕ್ಷಣವೇ ಬರುತ್ತಿದ್ದ ದುಃಖವನ್ನು ಬಲವಂತಕ್ಕೆ ಹಿಮ್ಮೆಟ್ಟಿಸಿ... ಹೇಗಿದ್ದೀಯಾ ಮಾವ ಎಂದು ಅಪ್ಯಾಯತೆಯಿಂದ ಕೇಳಿದಾಗ ಇದುವರೆಗೂ ಅವಿಟಿತ್ತಿದ್ದ ದುಃಖವೆಲ್ಲಾ ಕಣ್ಣೀರ ಕೊಡಿಯಾಗಿ ಹರಿಯಿತು... ನೀನೇ ಹೀಗೆ ಅತ್ತರೆ ಹೇಗೆ ಮಾವ... ನನ್ನ ಪರಿಸ್ಥಿತಿಯಲ್ಲಿ... ನಾನು ಬದುಕಿರುವುದೇ ಹೆಚ್ಚು.... ನಿನಗೂ ಬೇಡದವಳಾಗಿ, ಅಪ್ಪನ ಪ್ರತಿಷ್ಠೆ ಗೆ ಯಾರನ್ನೋ ಕಟ್ಟಿಕೊಂಡು, ಮನಸ್ಸಿಲ್ಲದ ಮನಸ್ಸಿನಿಂದ ಅವನೊಂದಿಗೆ ಬಾಳುತ್ತಾ, ನಮ್ಮಿಬ್ಬರ ವಿಷಯ ತಿಳಿದ ಆ ಗಂಡ ನೆಂಬ ಷಂಡ... ನನ್ನ ಮೇಲೆಯೇ ಅನುಮಾನ ತಾಳಿ ಚಿತ್ರ ವಿಚಿತ್ರ ಹಿಂಸೆಗಳನ್ನು ಕೊಡ್ತಾ...ಯಾರ್ಯಾರನ್ನೋ ಕರೆತಂದು ಅವರನ್ನೂ ತೃಪ್ತಿ ಪಡಿಸು ಎಂದು ಕೇಳುವಾಗ,  ಬಲವಂತದಿಂದ ಅವರ ಹಾಸಿಗೆಗೆ ನೂಕುವಾಗ  ನಾ ಸಾಯಬೇಕಿತ್ತು... ಎಂದಾದರೂ ಒಮ್ಮೆ ನಿನ್ನ ಮುಖ ನೋಡುವೆನೆಂಬ ಅದಮ್ಯ ಆಸೆಯಿಂದ ಬದುಕಿದ್ದೇನೆ ಗೊತ್ತಾ ಎಂದು ನನ್ನ ಸ್ವಪ್ನ ಉಮ್ಮಳಿಸಿ ಬರುತ್ತಿದ್ದ ಅಳುವಿನ ಮಧ್ಯೆಯೂ ಹೇಳುತ್ತಿದ್ದಾಗ..ಅಯ್ಯೋ ವಿಧಿಯೇ... ಇಂಥ ಅಮಾನುಷರ ಕೈಯ್ಯಲ್ಲಿ ನನ್ನ ಸ್ವಪ್ನಳನ್ನೇಕಿಟ್ಟೆ.... ಅಂದು ಅವಳು ಪರಿಪರಿಯಾಗಿ ಅಂಗಲಾಚಿದಾಗಲಾದರೂ ಅವಳನ್ನೇ ಮದುವೆಯಾಗುವ ಮನಸ್ಸು ಕೊಡಬಾರದಿತ್ತೆ ಎಂದು ನನ್ನನ್ನು ನಾನೇ ಹಳಿದುಕೊಂಡೇ....  ಮಾವ  ನನ್ನೊಂದು ಆಸೆ ನೆರವೇರಿಸಿ ಕೊಡುವೆಯಾ ಎಂದವಳ ಮಾತಿಗೆ ತಲೆಯಾಡಿಸಿದೆ...  ಮಾವಾ ನಿನ್ನ ಮಡಿಲಲ್ಲೊಮ್ಮೆ ಮಲಗುವಾಸೆ ಎಂದಾಗ ದೇವಸ್ಥಾನದ ಕಟ್ಟೆಯ ಮೇಲೆ ಕುಳಿತು ಕೈಚಾಚಿದೆ. ಎಳೆಯ ಮಗುವಿನಂತೆ ಓಡಿಬಂದ ಬಂದ ಸ್ವಪ್ನ ನನ್ನ ತೊಡೆಯ ಮೇಲೆ ಮಲಗುತ್ತಾ  ಅಂದೂ  ಹೇಳಿದ್ದೆ ಮಾವ " ಬದುಕಿದರೂ ನಿನ್ನ ಮಡಿಲಲ್ಲೇ... ಸತ್ತರೂ ನಿನ್ನ ಮಡಿಲಲ್ಲೇ" ಅಂತ... ದೇವರು ಆ ಭಾಗ್ಯವನ್ನು ನನ್ನ ಪಾಲಿಗೆ ಕರುಣಿಸಿದ್ದಾನೆ...  ಮಾವಾ............................. ನೀರವ ಮೌನ ವ್ಯಾಪಿಸಿತು.........  ನಾನೇ.ಮೌನ ಮುರಿದು  ಸ್ವಪ್ನ.. ಸ್ವಪ್ನ.....ಎಂದೆ ಅವಳನ್ನು ಮುದ್ದಿಸಿದೆ, ಅಪ್ಪಿದೆ.... ಯಾವುದಕ್ಕೂ ಅವಳ ಸ್ಪಂದನೆಯಿಲ್ಲ..... ಯಾವಾಗಲೋ ಅವಳ ಪ್ರಾಣಪಕ್ಷಿ ಹಾರಿಹೋಗಿತ್ತು... ...  ನನ್ನ ಸ್ವಪ್ನ ಪಂಚಭೂತಗಳಲ್ಲಿ ಲೀನವಾದಳು.... ಯಾರದೋ ವೈಷಮ್ಯಕ್ಕೆ ನನ್ನ ಸ್ವಪ್ನ ಬಲಿಯಾಗಿದ್ದಳು... ಸ್ವಪ್ನ ಸ್ವಪ್ನವಾಗೇ ಉಳಿದಳು😞

            ಶೈಲೂ......