233 ನುಡಿಯಲಿದೆ ಸಾವಿರ

ನುಡಿಯಲಿದೆ ಸಾವಿರ

******************

ನುಡಿಯಲಿದೆ ಸಾವಿರ

ಮಾತಾಡೆ ಮನ ಹಗುರ

ಮಾತನಾಡದೇಕೋ ತುಟಿಬಿಚ್ಚಿ

ಹೊರಬಿದ್ದ ಮಾತಿಗ್ಹೆದರಿ ತುಟಿಕಚ್ಚಿ

ಕೈ ಹಿಂದಿಕ್ಕಿ ನಿಂತ ಭಂಗಿ

ಸೊಗಸು ತೊಟ್ಟ ನಿಲುವಂಗಿ

ಕಣ್ಣಲ್ಲೇ ಮಾತುಗಳ ವಿನಿಮಯ

ನೋಟದ ಕೂಟದಲೇ ತನ್ಮಯ

ತಲೆತಗ್ಗಿದ್ದರೂ ದೃಷ್ಟಿಯಿದೆ ನೇರ

ಕಣ್ಣಂಚು ದಾಟಿ ತುಳುಕಿದೆ ವಿಚಾರ

ಗಾಂಭೀರ್ಯ ಗತ್ತಲೆಂತೋ ವಿಷಯ

ಬೀಸುವ ಬಲೆ ಇದೆಂಬ ಸಂಶಯ

ಇರಬಹುದು ಆಧುನಿಕ ನಾರಿ

ದಾಟಿಲ್ಲವೆಂದು ಸಭ್ಯತೆಯ ಮೀರಿ

ಏನಾದರಾಗಲಿ ನಿಲ್ಲು ನೀ ದೂರ

ಪ್ರಾಯವಿದು ಬೆಂಕಿ ಇರಲಿ ಅಂತರ

ಅದರೆಕೋ ಬೇಡವೆನ್ನದ ಮನಸು

ಸನಿಹ ಬಯಸಿ ಕಾಣುವ ಕನಸು

ಅರ್ಥವಾಗದಿದು ದ್ವಂದ್ವ ವಿಷಯ

ಹೆಜ್ಜೆಯಿಡಲದೇಕೋ ಭಯ 

             ಶೈಲೂ....