219 ಕದನ

ಕದನ

*****

ಬದುಕೊಂದು ನಿರಂತರ

ನಿಲ್ಲದ ಬಗೆಹರಿಯದ ಕದನ

ಉಗ್ರ ಹೋರಾಟ ಕಾದಾಟ

ಸಿದ್ಧರಿರಬೇಕು ಎದುರಿಸಲು ಜತನ

ಮುಗಿಯಿತೊಂದೆನ್ನುವಷ್ಟರಲ್ಲೇ

ಮತ್ತೊಂದು ಯುದ್ಧಸನ್ನದ್ಧ

ಯುದ್ಧವೋ ವಾಗ್ಯುದ್ಧವೋ

ಸೆಣೆಸಲಿರಬೇಕು ಸದಾ ಸಿದ್ಧ

ಮೊಳಗುತ್ತಿದೆ ರಣಭೇರಿ

ಸೆಣೆಸಲು ಕಾಲನೊಡನೆ

ಮೊಳಗಿಸಲೇಬೇಕು ಜಯಭೇರಿ

ನಿಲ್ಲದ ನೋವುಬಾವುಗಳೊಡನೆ

ಝಲಪಿಸುತ್ತಿದೆ ಸಾವಿರ ಸಾವಿರ

ಸಮಸ್ಯೆಗಳ ತೀಕ್ಷ್ಣ   ಶಸ್ತ್ರಾಸ್ತ್ರ

ಯುಕ್ತಿಯಿoದೆದುರಿಸಿ ನಿವಾರಿಸಲು

ಬಳಸಬೇಕು ಬಗೆಬಗೆಯ ದಿವ್ಯಾಸ್ತ್ರ

ಗೆದ್ದೇವೆಂದು ಬೀಗುವಷ್ಟರಲ್ಲಿಯೇ

ಎಲ್ಲಿಂದಲೋ ಆವರಿಸಿ ಸೋಲಿನ ಕರಿನೆರಳು

ಕಬಳಿಸುವುದು ಆತ್ಮವಿಶ್ವಾಸ

ಹತಾಶೆಯಲಿ ಬುದ್ಧಿ ಅರಳು ಮರುಳು

ಸಹಿಸಬೇಕು ಎಲ್ಲ ಕೋಪತಾಪಗಳ

ಪ್ರಕ್ಷುಬ್ಧ ಮನದ ಕೋಲಾಹಲಗಳ

ಸನ್ನದ್ಧವಾಗಿರಬೇಕು ಧರಿಸಿ ಶಸ್ತ್ರಾಸ್ತ್ರ

ಸಹನೆ  ಸಹಿಷ್ಣುತೆ ಯ ಬ್ರಹ್ಮಾಸ್ತ್ರ

ದೇಹದ ರಥದಲ್ಲಿ ವಿರಾಜಿಸುತಿಹ

ಆ ದೇವನೆಂಬ ಅಂತರಾತ್ಮ

ಒಳದನಿಯಲೇ ಬೋಧಿಸುತಿಹ

ಭಗವದ್ಗೀತೆಯ ಆ ಪರಮಾತ್ಮ

ಮನ್ನಿಸಬೇಕು ಅಂತರಾತ್ಮನ

ಉದ್ಧರಿಸುವ ಕೊರಳದನಿಗೆ

ಬೇಡ ನಿರ್ಲಕ್ಷ್ಯ...ಅನುಸರಿಸು

ಅದೇ ಬದುಕು ಬೆಳಗುವ ದೀವಿಗೆ

ಮರೆತೆಯಾದರೆ ಒಡಲ ಮಾರ್ದನಿ

ಕವಿದೀತು ಕತ್ತಲೆ ಸತ್ಯ ಕಾಣದಂತೆ

ಬದುಕ ಬಂಡಿಯ ಸೂತ್ರವವನ ಕೈಲಿ

ಸೋಲಿಲ್ಲ ಶರಣಾಗತಿಯ ಭಾವವಿದ್ದರೆ

            ಶೈಲೂ.....