290 ನೋಯದಿರು_ಮಗಳೇ

#ಚಿತ್ರಕಾವ್ಯ_ಅಭಿಯಾನ_೧೫

#ನೋಯದಿರು_ಮಗಳೇ

ನೋಯದಿರು ಮಗಳೇ ಹೀಗೆ

ಇದೆ ನಿನಗೆ ಈ ಅಮ್ಮನ ಹೆಗಲು

ಯಾರಿಲ್ಲವೆಂದು ಕೊರಗದಿರು ಅತ್ತು

ನೀ ನನ್ನ ಪ್ರಾಣಕ್ಕಿಂತ ಮಿಗಿಲು

ಈ ಪುರುಷ ಸಮಾಜದಲ್ಲಿ ಏಕೋ

ಸ್ತ್ರೀಯ ಸ್ಥಾನಮಾನ ತೃಣಕ್ಕಿಂತ ಕಡೆ

ಅರಿಯರವರು ಮೂಢ ಜನರು

ಹೆಣ್ಣವಳು, ಛಾಪಿತ್ತಳು ಎಲ್ಲ ಕಡೆ

ಮುದುಡದಿರು ಮನನೊಂದು ಮಗು

ಹೆಣ್ಣೆಂದು ಜರಿವವರೆಲ್ಲರೂ ಮೂಢರು

ಹೆಣ್ಣಿನಿಂದಲೇ ಬಾಳ ಬೆಳಕು ಅವಳೇ

ಆ ದೈವ ಸ್ವರೂಪಿಣಿ ಎಂದರಿಯರು

ತೊತ್ತಿನಾಳಲ್ಲ, ತುತ್ತಿತ್ತು ಸಲಹುವಳು

ಎಂದೇಕರಿಯರೊ ಅವರು ನಾ ಕಾಣೆ

ಗಂಡಿನ ಸರಿಸಮಕೆ ದುಡಿದರೂ

ಏಕೋ.. ಗಂಡೆ0ಬ ಹಮ್ಮಿಗೇ ಮಣೆ

ಕಷ್ಟ ಸಹಿಷ್ಣುತೆ, ಸುಖ ದುಃಖ

ನೋವುನಲಿವುಗಳಿಗಿದೆ ಒಂದು ಮಿತಿ

ಗಂಡಿನಾಶ್ರಯವಿಲ್ಲದೆ ಸಾಗಿಸಬಹುದು

ಬದುಕು ಆ ದೇವ ಮೆಚ್ಚುವ ರೀತಿ

ಎದ್ದೇಳು.. ತೋರಿಸು ಬಾ ಮಗಳೇ

ಹೆಣ್ಣೆಂಬ ಶಕ್ತಿಯ ವಿರಾಟ್ ರೂಪವ

ಅಚ್ಚರಿಗೊಳ್ಳಲೀ ಜಗ, ಮೆಚ್ಚಿ ಹೆಣ್ಕುಲವ

ತೊಡೆದು ಕೊಳ್ಳಲೀ ತಾ ಮಾಡಿದ ಪಾಪವ

ಡಾ: B.N. ಶೈಲಜಾ ರಮೇಶ್